Enpresa bezala, eguneroko lana bideratzen duten hainbat oinarri ditugu: Euskara, Software Librea, Estandarrak, Irisgarritasuna eta Erabilerraztasuna

Euskara

Teknologia berriak euskaraz... Euskara teknologia berrietan:

Eraikitzen ari garen mundu sustraigabeko honetan, euskara eta euskara bezalako hizkuntzek gero eta leku gutxiago omen dute. Are gutxiago teknologia eta informatika arloetan. Hala, bada, hau bereziki izan da, egitasmo hau aurrera ateratzeko arrazoietariko bat. Leloak dioen legez, informatika zerbitzuak euskaraz eman nahi dira eta ahal den neurrian gure hizkuntza, euskara, teknologia berrietan eta interneten hedatu.

Gure konpromiso honetan laguntzeko Bitarlan-ek Bai euskarari Ziurtagiria Zerbitzua eta lana euskaraz eskuratu du. Halaber, Bai Euskarari Ziurtagiriaren Elkarteko zuzendaritza batzordean dago.

Software Librea

Zuk sagar bat badaukazu, nik beste bat eta elkartrukatzen baditugu sagar bana dugu, baina zuk ideia bat badaukazu, nik beste bat eta elkartrukatzen baditugu ideia bina ditugu:

Paralelismo honen bitartez, azaldu ohi du Richard Stallmanek, software librearen aitzindari eta sustatzaile nagusietarikoa, jakintza librearen funtsa.

Softwarea librea izan dadin hurrengo askatasunak bete behar ditu aplikazio batek:

• Edonola aplikazioa erabiltzeko askatasuna
• Aplikazioa nola dabilen aztertzeko eta edonoren beharretara moldatzeko askatasuna. Iturburua edo aplikazioaren mamia eskuragai egon behar da honetarako.
• Kopiak egiteko eta banatzeko aukera mugarik gabe.
• Aplikazioa edonork aldatzeko, hobetzeko eta berriz banatzeko askatasuna. Iturburua edo aplikazioaren mamia eskuragai egon behar da honetarako.

Beraz, software libreaz balia gaitezke eta software librea eskaintzen zaie bezeroei, zerbitzu hobeak, azkarragoak eta merkeagoak emateko, ez da gurpila berriz asmatu behar, asmatuta badago jada. Horretaz aparte, iturburuaren jabetzari dagokionez, bezeroa ez da garatzaileari lotuta gelditzen.

Bizitza honetako arlo guztietan bezala, jasotzeko, eman behar da. Horrenbestez, gure konpromisoa software librearen komunitatea handitzeko eta ekarpenak egiteko beharrezkoa da.

Konpromiso honen adierazle bezala, Bitarlan Euskadiko Software Libreko Enpresen Elkarteko (ESLE) kidea da eta elkarte honetako zuzendaritza batzordeko kidea.

Estandarrak

Nortasunari eutsiz... elkar ulertzerako bidean:

Informatika eta teknologia arloan ere, gezurra dirudien arren, artisautza lana egin daiteke. Horregatik, eskulanak ahalbidetzen duen nortasuna dute egitasmo honen lanek. Halaber, eskulan horri esker posiblea da askotan lan garbia eta estandarra gauzatzea.

Honenbestez, aplikazio eta sistema informatikoen aniztasuna muga ez dadin askatasuna baizik, bakoitzak bere nortasunari eutsita, gustukoago duen plataforma edo nabigatzailea erabil dezan, aniztasun horretan hautatzeko aukera bermatu behar dugu estandarrak erabiliz.

Irisgarritasuna

Zailtasunak edota ezintasunak mugak izan ez daitezela, ez mundu errealean, ez mundu birtualean:

Eraikuntzan honezkero gertatzen den bezala, web eta informatika munduan ere aintzat jotzen da irisgarritasuna, eta zorionez, web gune eta aplikazio baten kalitatearen irizpide bihurtu da.

Web gune irisgarria izateak hainbat eta hainbat abantaila dakartza, ezintasunak edo zailtasunak dauzkan lagunek, itsuek esate baterako, irakur edo entzun dezaketela da nagusia, baina ez horrengatik soilik, baizik eta egungo edozein nabigatzaile grafiko zein testu nabigatzailetatik sartzea ere baimentzen baitu komenigarria da. Egun, nabigatzaile, sistema eta plataforma anitz ditugu aukeratzeko, gero eta gehiago, dispositibo eramangarriak adibidez, eta funtsezkoa da gure web gunea aukera horietatik guztietatik irisgarria izatea. Honez, gain, Interneteko bilatzaileei begira ere oso onuragarria da.

Erabilerraztasuna

Erabilpen konplexuak ez du zertan erabilera konplexua ekarririk :

Web edo aplikazio batek erabilpen konplexuak edukitzeak ez du esan nahi erabilera zaila izan behar denik. Ahaleginak erabiltzaileari lana errazteko zuzendu behar dira.